اسلام آباد۔20اکتوبر(اے پی پی)وزیراعظم محمد شہباز شریف پاکستان اچ اقلیتاں دے قابل فخر کردار دی تعریف کریندے آکھیے پاکستان امن، ہم آہنگی اتے برداشت دی سرزمین اے، اتھاں نفرت، فتنہ فساد، انتشار اتے دہشت گردی کیتے کوئی گنجائش کائنی، اقلیتاں کوں مذہبی آزادی حاصل اے اتے حکومت انہاں کیتے خصوصی اقدامات کیتن۔ اے ڳالھ اتھاں وزیراعظم ہاؤس اچ دیوالی دے تہوار تے منعقدہ خصوصی تقریب نال خطاب کریندے آکھی۔ ایں موقع تے وفاقی وزراء، اقلیتاں نال تعلق رکھݨ آلے اسمبلی دے ارکان اتے مختلف اقلیتی برادریاں دے سرکردہ لیڈر موجود ہن۔ وزیراعظم تقریب نال خطاب کریندے ہ??دو برادری کوں دیوالی دی مبارخ ݙتی۔ انہاں آکھیا جو اڄ اتھاں اقلیتاں اتے اکثریت دے مذہبی، سیاسی نمائندیں دی موجودگی تصور پاکستان دی عملی تصویر اے، بانی پاکستان قائداعظم محمد علی جناح 11 اگست دی تقریر اچ اعلان کیتا ہئی جو سارے مذہب دے منݨ آلے پاکستان اچ آپݨیاں عبادتاں دیاں جھئیں اچ کہیں خوف اتے ݙَر توں بغیر آپݨی عبادت اتے رسومات ادا کرسڳدن، انہاں کوں مذہبی آزادی حاصل اے، قیام پاکستان توں دفاع پاکستان تئیں ہر محاذ تے اقلیتی برادریاں جیویں قابل فخر کردار ادا کیتے ایں تے اساکوں ماݨ اے۔ اڄ دا ݙینھ ایں حقیقت کوں مزید واضح کریندے جو مسلم اتے غیر مسلم پاکستانی رَل ت?? وطن عزیز دے خلاف تھیوݨ آلی کہیں وی شر انگیزی اتے حملے دا مقابلہ کریندن اتے اقلیتاں نال کہیں وی نا انصافی دے افسوس دے لائق اتے مذمت دے لائق واقعیں کوں پاکستان دی اکثریت کݙاہیں وی پسند نی کیتا اتے ہمیشہ ایں دی مذمت کیتی اے۔ وزیراعظم تعلیم، صحت سودھے سارے شعبیں اچ اقلیتاں دیاں ڳالھ منݨ آلیاں خدمات دا ذکر کریندے آکھیا جو ساریاں سیاسی جماعتاں اچ انہاں دی نمائندگی موجود اے، مسلم لیگ ن دی حکومت اچ کھیئل داس کوہستانی وزیر مملکت ہن، ہ??دو مسیحی برادری دے ممبران سینیٹ اسمبلیاں اچ موجود ہن۔ وزیراعظم اقلیتاں کیتے حکومتی اقدامات کوں اُجاگر کریندے آکھیا جو وفاقی کابینہ دی طرفوں بین المذاہب ہم آہنگی پالیسی دی منظوری ݙتی ونڄ چکی اے، حکومت دی ݙوجھی وݙی کامیابی قومی اقلیتی کمیشن ٻل دی سینیٹ و اسمبلی توں منظوری اے تاں جو کمیشن کوں قانونی طور تے مضبوط کیتا ونڄ سڳے۔ انہاں آکھیا جو میکوں اے ݙسیندے خوشی تھیندی پئی اے جو اقلیتاں نال تعلق رکھݨ آلے طالب علماں کوں پرائمری توں یونیورسٹی دی اعلیٰ تعلیم تئیں وظیفے ݙتے ویندے پئن، وزیراعظم یوتھ پروگرام دے تحت مختلف پروگراماں اچ وی انہاں کوں شامل کیتا ڳئے، میرٹ دے علاوہ انہاں کیتے سرکاری نوکریاں اچ پنج فیصد کوٹہ مختص اے، انہاں دے مذہبی تہواراں تے انہاں کوں چھٹیاں ݙتیاں ویندن۔ وزیراعظم آکھیا جو پاکستان اجالے، امن، ہم آہنگی اتے برداشت و تحمل دی سرزمین اے، اتھاں نفرت، فتنہ فساد، انتشار اتے دہشت گردی کیتے کوئی جاہ کائنی، پوری قوم دہشت گردی دے اندھاریں اتے نفرت دی تاریکی کوں مٹاوݨ دی جدوجہد اچ آپݨی بہادر مسلح افواج دے نال کھڑی اے۔ وزیراعظم شہباز شریف ہ??دو برادری دے نال دیوالی دا کیک وی کَٹیا۔ وزیراعظم ہاؤس اسلام آباد اچ دیوالی دے موقع تے تقریب دے انعقاد تے ہ??دو برادری شکریہ ادا کیتا۔ ایں توں پہلے وفاقی وزیر مذہبی امور سردار محمد یوسف تقریب نال خطاب اچ آکھیا جو اڄ دا دیوالی دا پروگرام پرامن پاکستان دا پیغام ݙیندے، پاکستان ہک امن پسند خطہ اے۔ وزیرمملکت کھیئل داس کوہستانی تقریب نال خطاب کریندے آکھیا جو محمد نواز شریف 2015ء اچ بطور وزیراعظم دیوالی دا تہوار سرکاری سطح تے منایا، ایں سال سرکاری سطح تے وزیراعظم ہاؤس اچ دیوالی دے پروگرام دا انعقاد کیتا ویندا پئے۔ انہاں آکھیا جو دشمن اساݙے مدرسیں تے حملے کیتے پر پاک فوج جوابی کارروائی اچ کہیں مذہبی جاہ یا سول آبادی تے حملہ نی کیتا، پاکستان اچ اقلیتاں کوں سارے آئینی حقوق اتے مذہبی آزادی حاصل اے، بھارت اچ ساریاں اقلیتاں دے نال چنڳاں سلوک نی کیتا ویندا۔ انہاں آکھیا جو مسلح افواج مودی دا تکبر مٹی اچ مِلا ݙتا۔
.jpg)
