اسلام آباد۔ 1 اکتوبر(اے پی پی) وزیراعظم دی سفارش تے صدر مملکت انسانی ہمدردی سانڳے آئینی لوڑھ دے مطابق عبدالباسط دی سزائے موت معاف کر ݙتی۔ وزیراعظم دی قیادت اتے انہاں دی انصاف اتے انسانی ہمدردی نال وابستگی ایں فیصلے کوں یقینی بݨاوݨ اچ بنیادی حیثیت رکھدی اے۔ وفاقی وزیر برائے قانون، انصاف اتے انسانی حقوق سینیٹر اعظم نذیر تارڑ وی ایں سانڳے اہم کردار ادا کیتے وزارت انسانی حقوق پنجاب دے محکمہ جیل خانہ جات نال رابطہ رکھیندے ہوئے معاملے کوں توڑ پڄائے۔ بدھ کوں وزارت انسانی حقوق دے مطابق عبدالباسط جیڑھا ہک معذور (پیرالیجک) قیدی ہئی، صدر مملکت ولوں آئین دے آرٹیکل 45 دے تحت ݙتی ڳئی معافی دے بعد بدھ کوں فیصل آباد سینٹرل جیل توں رہا کر ݙتا ڳئے۔ انہاں دی معذوری اتے طویل عرصہ سزائے موت دے قیدیاں دی کوٹھڑی اچ قید رہوݨ پاروں اے معاملہ کئی واری انسانی ہمدردی سانڳے اڳونہا کیتا ڳیا ہا۔ وزیراعظم اتے وفاقی وزیر برائے انسانی حقوق دی ہدایات تے پارلیمانی سیکرٹری برائے انسانی حقوق صبا صادق بدھ کوں عبدالباسط دی رہائی دے موقع تے فیصل آباد سینٹرل جیل پُڄیاں۔ انہاں آکھیا جو او وزیراعظم اتے وفاقی وزیر برائے انسانی حقوق دی خصوصی ہدایت تے عبدالباسط نال ملݨ آئن۔ انہاں مقتول دے ورثاء نال ہمدردی کریندے آکھیا جو انہاں دا ݙکھ ڳھٹ نئیں سقدا ٻھل اے فیصلہ انصاف اتے انسانیت دے انہاں اصولاں کوں ݙسیندے جیندے ودھارے اتے تحفظ دی ریاست پابند اے۔
