اسلام آباد۔21ستمبر (اے پی پی) صدرِ مملکت آصف علی زرداری چین دے اہم دورے دے بعد وطن واپس پڄ ڳئن۔ چین اچ رہݨ دے دوران صدر مملکت آصف علی زرداری چنگڈو، شنگھائی، اُرومچی اتے کاشغر دا دورہ کیتا اتے صوبائی قیادت نال ملاقاتاں کیتیاں۔ پاک۔چین تعلقات، سی پیک منصوبیں اتے مستقبل دیاں راہداریاں تے تفصیل نال ڳالھ مہاڑ کیتی۔ ایوان صدر دے پریس ونگ توں جاری بیان موجب صدر مملکت آصف علی زرداری چین دے دورے دے موقع تے علاقائی امن، ترقی اتے ݙو طرفہ تعاون تے تفصیل نال ڳالھ مہاڑکیتی۔ انہاں اہم مفاہمت دیاں یادداشتاں (ایم او یوز) تے دستخط کیتے جیڑھے ݙوہیں ملکاں دے تعلقات دے ودھارے اچ سنگِ میل ہوسن۔ صدر مملکت آصف علی زرداری دا دورہ پاک۔چین اسٹریٹجک سانجھ داری دے عزم دی نویں سروں تصدیق اے۔ ایں توں پہلے صدر مملکت کوں کاشی لیننگ انٹرنیشنل ایئرپورٹ توں کاشغر دے پارٹی سیکرٹری اتے سنکیانگ دے نائب گورنرنیے ژوانگ روانہ کیتا۔ ایں موقع تے ݙوہیں ملکاں دے سفیر وی موجود ہن۔ صدر مملکت آصف علی زرداری چینی قیادت دی میزبانی تے اظہارِ تشکر کریندے آکھیا جو صدر شی جن پنگ دے وژن دے تلے چین خاص کر سنکیانگ اچ تھیوݨ آلی ترقی قابل تعریف اتے متاثر کن اے۔ انہاں خواہش ظاہر کیتی جو مستقبل اچ پاکستان اتے چین دے عوام سیاحت اتے تجارت کیتے زمینی رستے دے ذریعے سوکھیں سفر کرسڳن۔
