لاہور۔5 اکتوبر (اے پی پی) وزیراعظم محمد شہباز شریف ملائیشیا دے سرکاری دورے تے کوالالمپور روانہ تھی ڳئن، نائب وزیراعظم تے وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ تے وزیراعظم دے معاون خصوصی طارق فاطمی وزیراعظم دے رلےہن۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف 5 توں 7 اکتوبر تئیں ملائیشیا دے وزیراعظم انور ابراہیم دی دعوت تے ملائیشیا دا دورہ کریندے پئن۔ وزیراعظم دورے دے دوران ملائیشیا دے وزیراعظم نال ملاقات کریسن جݙاں جو ݙوہیں ملکاں وچال وفد دی سطح تے وی ڳالھ مہاڑ تھیسی، ݙوہیں ملکاں وچال مختلف شعبیں وچ تعاون دے معاہدیں تے مفاہمتی یادداشتاں تے دستخط وی تھیسِن۔ ݙوہیں رہنما تجارت، آئی ٹی تے ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر تے ڈیجیٹل معیشت وچ ݙوطرفہ تعاون کوں ودھاوݨ تے وی غور کریسن، عوام نال عوام دے رابطے ودھاوݨ کیتے نویں تعاون دے موقع ڳولݨ تے وی ڳالھ مہاڑ تھیسی۔
