ارومچی۔ 18 ستمبر (اے پی پی) صدر مملکت آصف علی زرداری سنکیانگ اسلامک انسٹی ٹیوٹ دا دورہ کیتا۔ انسٹی ٹیوٹ دے صدر مختیرے سیفو صدر کوں انسٹی ٹیوٹ دی تعلیمی تے تربیتی سرگرمیاں متعلق بریفنگ وچ ݙسیا جو ادارہ مذہبی علما، آئمہ تے خطباء دی تیاری وچ اہم کردار ادا کریندا پئے ۔ انسٹی ٹیوٹ دا مقصد مذہبی تعلیم کوں جدید علوم دے نال ہم آہنگ کرتے ایہو جیھے طلبہ تیار کرݨا اے جو دین تے معاشرے ݙوہائیں دی خدمت کر سڳن۔ ایوان صدر دے پریس ونگ توں جاری بیان موجب صدر مملکت کوں سنکیانگ اسلامک انسٹیٹیوٹ دے دورے دے دوران ݙسیا ڳیا جو انسٹی ٹیوٹ وچ قرآن، حدیث، اسلامی فقہ، عربی تے الہیات (عقائد اسلام)، تاریخ، کمپیوٹر خواندگی، اخلاقیات تے سائنس سودھے چینی زبان، دیوانی قانون تے علاقائی مذہبی پالیسیاں کوں وی شامل کیتا ڳئے۔ صدر مملکت کوں ݙسیا ڳیا جو انسٹی ٹیوٹ دے مرکزی کیمپس وچ ہک ہزار طلبہ کیتے گنجائش موجود اے جݙاں جو ایندے ذیلی ادارے سنکیانگ دے ٻئے علاقیں وچ وی قائم ہن۔ ادارے وچ مرکزی مسجد، کتب خانہ، لیکچر ہالز، کلاس رومز تے ہاسٹل سودھے جدید سہولتاں دستیاب ہن۔ طلبہ کوں دوران تعلیم وظیفہ، رہائش تے ٻیاں سہولیات ݙتیاں ویندن۔ سال 2001 توں ہݨ تئیں انسٹی ٹیوٹ دے 28 ہزار توں ودھ طلبہ فارغ التحصیل تھی چُکئن جیڑھے مذہبی، تعلیمی تے انتظامی شعبیں وچ خدمات انجام ݙیندے پئن۔ ادارہ اسلامی متون دے تراجم تے اشاعت تے حج دے انتظامات وچ وی معاونت کریندے۔ صدر مملکت آصف علی زرداری انسٹی ٹیوٹ دی خدمات دی تعریف کریندے آکھیے جو پاکستان تے چین وچال علمی تے ثقافتی رابطے ݙوہائیں ملکاں دے عوام کوں نیڑے گھِن آوݨ وچ اہم کردار ادا کریندے پئن۔ ایں موقع تے سینیٹر سلیم مانڈوی والا، پاکستان دے چین وچ سفیر تے چین دے پاکستان وچ سفیر وی موجود ہن۔
