دوحہ۔11 ستمبر (اے پی پی) وزیراعظم محمد شہباز شریف قطر دے دارالحکومت دوحہ پڄ ڳئے۔ دوحہ ایئرپورٹ تے قطر دے نائب وزیراعظم تے وزیر مملکت برائے دفاع شیخ سعود بن عبدالرحمن بن حسن الثانی وزیراعظم دا استقبال کیتا۔ خمیس کوں وزیراعظم آفس دے میڈیا ونگ ولوں جاری بیان موجب نائب وزیراعظم تے وزیر خارجہ محمد اسحاق ڈار، وزیر دفاع خواجہ محمد آصف، وزیر اطلاعات تے نشریات عطاء اللہ تارڑ اتے معاون خصوصی طارق فاطمی وزیراعظم دے نال پاکستانی وفد اچ شامل ہن۔ ہک ݙینھ دے سرکاری دورے اچ وزیراعظم قطر دے امیر شیخ تمیم بن حمد الثانی نال ملاقات کریسن۔ وزیراعظم دوحہ تے بلاجواز اسرائیلی جارحیت اتے بین الاقوامی قوانین دے خلاف حملے دے تناظر اچ قطر دے امیر اتے عوام نال یکجہتی دا اظہار کریسن۔ بیان موجب قطر اتے پاکستان اچ دیرینہ تاریخی برادرانہ تعلقات ہن جو مشترکہ عقیدے اتے اقدار تے مبنی ہن۔ پاکستان قطر دا ہمیش ہر اوکھے ویلھے ساتھ ݙتے اتے ݙیندا رہسی، ایں دا اظہار وزیراعظم قطر دے امیر نال ملاقات اچ کریسن۔ ملاقات اچ اسرائیل دے خطے دے مختلف ملکاں تے بلاجواز حملیاں اتے مسلسل جارحیت دے نال نال خطے اچ امن دے قیام کیتے وی مشاورت تھیسی۔
.jpg)
