اسلام آباد۔2اکتوبر (اے پی پی) وفاقی وزیر صحت مصطفی کمال نال اومان دے سفیر فہد خلف الخروصی دی ملاقات تھئی تے صحت دے شعبے سودھے ݙو طرفہ تعاون تے سانجھی دلچسپی دے امور بارے ڳالھ مہاڑ کیتی ۔ وزارت صحت موجب وزیر صحت مصطفی کمال آکھئے جو پاکستان تے اومان وچال مضبوط برادرانہ تعلقات ہن جیڑھے ݙوہیں ملکاں دے عوام دے مفاد وچ ولدا استحکام دا باعث بݨسن۔ انہاں صحت دے شعبے وچ جاری اصلاحات، ویکسین دی مقامی تیاری دے حوالے نال حکومتی اقدامات تے ݙوجھے ترقیاتی منصوبیں تے وی روشنی پاتی۔ وزیر صحت آکھئے جو ݙونہاں ملکاں وچال صحت دے مختلف شعبیں وچ مشترکہ تعاون نال نہ صرف طبی معیار وچ ودھارا تھیسے بلکہ تجربات کنوں فیدہ چاوݨ دے موقع وی بݨسن۔ انہاں خاص طور تے فارماسیوٹیکل شعبے وچ تکنیکی اشتراک دی اہمیت تے زور ݙیندے آکھئے جو ایں شعبے وچ ہک ݙوجھے کنوں سکھݨ دے بے شمار موقع موجود ہن۔ مصطفی کمال آکھئے جو پاکستان ویکسین دی مقامی تیاری کیتے پرعزم اے تے ایں ضمن وچ حکومت کئی اقدامات کیتن جیڑھے نہ صرف دیس دی صحت دی ضرورتاں کوں پورا کرݨ وچ مدد ݙیسن بلکہ عالمی سطح تے وی پاکستان دی صحت دی صلاحیتاں کوں نمایاں کریسن۔ اومان دے سفیر فہد خلف الخروصی پاکستان دے طبی شعبے دی مہارت کوں قابل تحسین قرار ݙیندے آکھئے جو انہاں دا ملکنرسنگ تے میڈیکل سپیشلسٹس سودھے ہنر مند طبی عملے دی خدمات حاصل کرݨ وچ دلچسپی رکھیندے۔ انہاں طبی تعلیم، پیشہ ورانہ تربیت تے ماہرین دے باقاعدہ تبادلے دی اہمیت تے وی زور ݙتا۔ ملاقات دے اختتام تے وزیر صحت آکھئے جو ݙونہاں ملکاں وچال صحت دے میدان وچ اشتراک عمل کوں ولدا مستحکم کرݨ دے اقدامات دی لوڑھ اے تاں جو ݙونہاں دیس ہک ݙوجھے دے تجربیں کنوں بھرپور فیدہ چا سڳن۔
.jpg)
