اسلام آباد۔1دسمبر(اے پی پی):پاکستان اچ امریکہ دے سفیر ڈونلڈ بلَوم آکھیے جو پاکستان اچ اڄوکے سال آوݨ آلے تباہ کُن سیلاب توں متاثر تھیوݨ آلے کساناں دی مدد کیتے امریکہ اقوام متحدہ دے ادارہ خوراک و زراعت (ایف اے او) دی معاونت توں 80 لکھ ڈالر مالیت دی امداد ݙتی ۔ ایں ڳالھ انہاں خمیس کوں تقریب توں خطاب کریندے ہوئیں آکھی اے ۔تقریب اچ سیلاب توں متاثرہ علاقیں توں تعلق رکھݨ آلے کسان وی موجود ہن ۔ اے امداد پاکستان اچ 2022ء دے سیلاب دے بعد انسانی ضرورتاں ، غذائی تحفظ اتے آفات نال نبݨݨ تے استعداد کار اچ ودھارے تے مرکوز 9 کروڑ 70 لکھ ڈالر مالیت دی اعلان کیتی ڳئی امداد دا حصہ اے۔تقریب توں خطاب کریندے ہوئیں امریکی سفیر امریکی امداد دی فراہمی اچ تسلسل دا ذکر کریندے ہوئیں اقتصادی ترقی اچ پاکستان تے امریکہ دی لمبی تاریخ دا حوالہ وی ݙتا تے آکھیے جو ترقیاتی چیلنجاں نال نبݨدے ہوئے ݙوہیں ملک مستقبل اچ اشتراک کار کیتے پُر امید ہن۔ اُنہاں آکھیے جیویں جو امریکہ تے پاکستان دے درمیان ماضی اچ ھک “سبز انقلاب” زندگیاں تے مثبت اثرات مُرتّب کیتے ہن ۔ بالکل اُوویں ھک “سبز اتحاد” وی موسمیاتی تبدیلی نال نبݨݨ دی صلاحیت، شفاف توانائی دی تیاری دے متبادل ذرائع تے اقتصادی ترقی کیتے محرک ثابت تھیسی۔
