اسلام آباد۔18جولائی(اے پی پی):وزیراعظم محمد شہباز شریف آکھیے جو خصوصی اقتصادی زونز اچ سعودی عرب اتے قطر سودھا ٻئے دوست ملکاں دے سرمایہ کار مختلف صنعتی شعباں اچ سرمایہ کاری توں فیدہ چا سڳدن، ملک اچ زرمبادلہ دے ذخائر 14 ارب ڈالر تھی چکین، ساکوں اتحاد ݙکھیندے ہوئے میثاق معیشت کر تے ایندے تے تسلسل نال عمل کرݨا ہوسی، سی پیک ملکی ترقی کیتے ہک وݙا منصوبہ اے، مشرق اچ اپݨے ہمسایہ ملک کوں معاشی میدان اچ شکست فاش ݙیسوں۔ اے ڳالھ انہاں اسلام آباد ماڈل خصوصی اقتصادی زون دا منݙھ ٻدھݨ دی تقریب نال خطاب اچ آکھی۔ انہاں ملکی معاشی بحالیکیتے دوست ملکاں دے تعاون دا شکریہ ادا کریندے پاکستان اچ زراعت، آئی ٹی و معدنیات سودھا ٻئے شعبیاں اچ سرمایہ کاری موعاقع توں فیدہ چاوݨ دا آکھیے، انہاں خصوصی اقتصادی زونز دا مقصد ملک اچ سرمایہ کاری ڳھن آوݨ اے، اقتصادی زونز اچ سرمایہ کاری کیتے سخت شرائط تے معاہدے کرݨے چاہیدن، سرمایہ کاراں کیتے ودھ سہولتاں، مراعات ݙیوݨ دی لوڑھ اے جو او پاکستان دو متوجہ تھیون، صنعتاں دے فروغ نال ملک ترقی کریسی۔ انہاں آکھیا جو کراچی اچ دھابیجی اقتصادی زون اتے خیبر پختونخوا اچ رشکئی اقتصادی زون مکمل تھیوݨ آلا اے، پنجاب و بلوچستان اچ اقتصادی زوناں دا منصوبہ اے۔ وزیراعظم آکھیے جو حکومت سیلاب نال نمتݨ دے اقدامات کیتن، بے نظیر انکم سپورٹ پروگرام اتے این ڈی ایم اے توں سیلاب متاثرہ علاقیاں اچ 100 ارب روپے ونݙین، دوست ملکاں وی ودھ تے ہتھ ونݙائے۔ مہنگائی، کݨک بحران اتے تیل دی درآمد وݙے مسلے ہین ٻھل آئی ایم ایف نال مذاکرات دی کامیابی نال ملک دے ݙیوالہ تھیوݨ دا خطرہ ٹل چکیے، معاشی نظام اچ اصلاحات ضروری ہین جو بوسیدہ سٹرکچر تبدیل تھیوݨا چاہیدے، معیشت ، صنعت و حرفت، کاروبار و زراعت کوں ترقی ݙویڄے۔ وزیراعظم آکھیے جو آندے انتخابات توں بعد ڄیڑھی وی حکومت آسی اوکوں ملکی ترقی کیتے ݙینھر ات کم کرݨا پوسی، بجلی و گیس سستی ݙیوݨ سوکھا نئیں، بجلی چوری و لائن لاسز وݙا چیلنج اے، سرکاری محکمیاں دی خرابیاں اتے بدعنوانی وݙا چیلنج ہین، گردشی قرضہ وی وݙا مسئلہ اے، ہر چیلنج دے باوجود ملک کوں اڳو تے ڳھن ونڄݨ کوں تیار ہیں، آئی ایم ایف نال معاہدہ تور ںبھیسوں، 22 کروڑ عوام دے مفاد کوں ترجیح ݙیوݨی ہوسی، اساں ݙینھ رات محنت کر تے ہر منزل تئیں پڄسوں۔
